Skoudėškē pėnkta karta kvėit rašītė žemaitėška dėktanta

Sausė mienesė vėdorie Skouda rajuona savėvaldībės Ruomoalda Granauskė bėbliuoteka ėšplatėna pranešėma, kad šiū metu vaserė 8 d. 18 adīna vīks žemaitėšks dėktants (anuo dalīvē tories rašītė laikīdamies kalbininka Pabriežas Jūzapa parėngtū žemaitėškas rašības patarėmu). Bėbliuotekas interneta svetainie īr paskelbta tuoki inpormacėjė:

„Dėktanta rašīms vīks mėšrē – ėr nuotuolėnio, ėr kontaktėnio būdo. Dėktants vaserė 8 dėina 18.00 adīna būs rašuoms ėr tėisiuogē translioujems internetė – Skouda rajuona savėvaldībės R. Granauskė vėišuosės bėbliuotekas FB paskīruo.

Dėktanta anuo dalīvē rašīs bėbliuotekuo ėr veiziedamė tėisiuogėnė transliacėjė. Anamė gal dalīvautė vėsė nuorėntėijē – ne tik Žemaitėjės, bet ė vėsuos Lietovuos gīventuojē, solaukė 14 metu, katrėms rūp pasėtėkrintė torėmas žemaitiu kalbuos gramatėkas ė rašības žėnės, ėšdieliuotas muokslėnemė daktara Pabriežas Jūzapa leidėnie „Žemaičių kalba ir rašyba“.

Dėktanta dalīvē, pabėngė anou rašītė, tou, kou parašė, tories par posadīni noskenoutė, nopaveiksloutė arba WORD pormata duokomėnto ėšsiūstė elektruonėnė pašta adreso dalia.zabitiene@gmail.com.

Regėstruotėis el. pašto birute.sruogiene@svb.lt

Galies dėktanta rašītė ėr be ėšonkstėnės registracėjės.

Kvėitam okatlīvā dalīvautė dėktanta rašīmė!“

Bėbliuoteka skelb, ka 2017 m. dėktanta rašė 12 dalyvių. Geriausē ons pavīka Skouda rajuona laikraštė „Mūsų žodis“ redaktuorē-leidiejē Kaniavienē Marītē ėr Skouda rajuona savėvaldībės R. Granausko vėišuosės bėbliuotekas darbuotuojoms Daukantienē Gražinā ėr Tiškienē Aušrā.  

2018 m. tarp 10 dalīviu geriausės žėmės paruodė Skouda literatu kluba „Nojus“ narės Jurgilevičienė Stasė, Pajauskienė Joana ėr Skouda rajuona laikraštė „Mūsų žodis“ redaktuorė-leidiejė Kaniavienė Marītė.

2019 m. jau bova mažne dvėgobā daugiau dėktanta dalīviu. Geriausē anou parašė Skouda rajuona savėvaldībės R. Granauskė vėišuosės bėbliuotekas vīresniuojė bėbliuotekininkė Daukantienė Gražina, Skouda rajuona laikraštė „Mūsų žodis“ redaktuorė-leidiejė Kaniavienė Marītė ėr Skouda literatu kluba „Nojus“ narie Pajauskienė Joana. Paskatėnamāsis prizos bova paskėrts jauniausē dėktanta dalīvē Ereminātē Renatā.

2020 m. dėktanta dalīvē jau bova ne tik ėš Skouda rajuona, bet ėr ėš kėtū Lietovuos vėitu. Tās metās jau vīka tėisiuogėnė dėktanta transliacėjė internetė. Po anuos bova solaukta 20 darbū. Šī karta geriausē sekies Lietovuos kaima rašītuoju sājungas, Skouda literatu kluba „Nojus“ tarības narē, Šatiu seniūnėjės Rukū kaima seniūnātē Lekniuvienē Danutē, Lietovos neprėklausuomu rašītuoju sājungas ėr Plungės literatu kluba „Vaivorykštė“ narē Stražinskātē-Glinskienē Irenā ėš Aleksėndrava (Pungės r.), Skouda rajuona laikraštė „Mūsų žodis“ redaktuorē-leidiejē Kaniavienē Marītē, aleksandravėškē bėbliuotekininkē Pokvītienē Virginėjē ėr Skouda rajuona savėvaldībės R. Granausko vėišuosės bėbliuotekas Lėnkėmu filiala bėbliuotekininkē Daukantienē Gražinā.


Regėjuonu kultūrėniu inicetīvu cėntros

Teksts parėngts pagal Skouda rajuona savėvaldībės R. Granauskė vėišuosės bėbliuotekas inpormacėjė

Teksts paskelbts 2022 m. sausė 21 d.  igyvendėnont 2022 m. Spauduos, radėjė ėr teleizėjės remama pruojekta „Elektruonėnis žornals „Žemaitiu žemė“

Smush Image Compression and Optimization