Pirmininkė – Loreta Sungailienė (Mukaitė).
Korporacėjės identifikacinis numeris (kodas) – 191935890.
Adresos: Poškos g. 7-3, LT-08123 Vilnius
Puslapis Facebook portale – https://www.facebook.com/VIRVYTE/
Akademėnė žemaitiu jaunima korporacėjė „Samogitia“ Lietovuos Respublikas teisingoma ministerėjuo iregistrouta 1996 m. groudė 24 d. Ana veikia vėsuomenėnės organizaciėjės (asocėjacėjės) teisiem.
Korporacėjė „Samogitia“ ī nepuolitėnė organizacėjė, katruo gal dalīvautė ivairiū tautībiu, religėju ėr pažiūrū žmuonės nu 16 metu omžiaus.
Svarbiausis korporacėjės tėkslos ī vienītė Žemaitėjės akademini jaunima ėr kėtus žmuonis, katrėi rūpėnas jaunima švėitėmo ėr ugdīmo, sudarītė geresnės sālīgas muokītėis ėr bėndrautė Žemaitėjės krašta istuorėnio ėr kultūrėnio paveldo besėiduomaujėntėms ėr tou pavelda saugontėms, aple anou informacėjė skleidontėms jaunėms žmuonėms, nukreiptė akademini ėr kėta jaunima studėjoutė Žemaitėjės praeiti ėr dabarti, užsienė šaliū etnuografiniu regiuonu kultūrėnė judiejėma tradicėjės ėr pasiekėmus, skleistė anū patirti Lietuvuo, dalīvautė tarptautėnėmė jaunima kultūrėnėmė ėr akademėnemė judiejėmė, ugdītė būsėmūsius Žemaitiu krašta tīrėnietuojus ėr muokslėninkus, vėsuomenės veikiejus, stėprintė neprėklausuoma ėr vėininga Lietuvuos valstībė.
Korporacėjė bėndradarbiaun so Regėjuonu kultūrėniu inicetīvu centro, kėtuom kultūras organizacėjuom.
Daugiau aple korporacėjė (žemaitėškā)
Tėms, katrėi iduomaujės žemaitiu stodėntu kultūrėniu sājūdiu istuorėjė, īr žėnuoma tarpukarė metās Lietuvuos aukštuosies muokīkluos veikusiu žemaitėšku korporacėju, katruos tonkē toriejė „Samogitia“ pavadėnėma, reikšmie bėndramė žemaitiu kultūrėnemė judiejėmė.
Žemaitiu akademėnė jaunima korporacėjės „Samogitia” isteigėms bova pėrms bandīms po Lietovuos neprėklausuomībės atgavėma atkortė tarpokarės metās veikosius stodėntu korporacėju veikla, besimuokonti Žemaitėjės jaunima itrauktė i žemaitiu kultūrėni ėr muokslėni jodiejėma.
Pėrmās sava gīvavėma metās „Samogitia“ cėntros glaudies pri Žemaitiu kultūras draugėjės redakcėjės = Žemaitiu kultūras draugėjės inpormacėnė kultūras cėntra, vuo paskiau pradiejė darba savaronkėškā.
Pradiuo korporacėjės branduoli sodarė ivairiuos Vilniaus aukštuosies muokīkluos besėmuokou ė nesenē muokslus bėngė jaunė žemaitē. Anėi sosėbūrė i žemaitiu fuolkluora kolektīva „Virvītė“. Ansamblis lig šiuol ī gīvs, dabā daugiau žėnuoms kāp Vėlniaus jaunū šeimū folkluoka kolektīvs „Virvītė“ (vaduovė – Sungailienė (Mukaitė) Loreta). Ons nemažā koncertoun, dalīvaun ivairiūs kultūrėniūs rėnginiūs.
1997 m. vasara korporacėjė organizava kompleksėnė ekspedicėjė Muosiedie (Skouda rajuons), dalīvava tarptautėnemė baidarininku sāskrīdie Gdanskė.
Kelis metus glaudė rīšē bova palaikuomė so Lėnkėjės Kašubu krašta kultūras organizacėjuom, liuob vīktė bėndras muokslėnės konfėrėncėjės, seminarā, ekskursėjės, kėtė ožsėjiemėmā. 1999–2002 metās karto so Lėnkėjės Respublikas Pamarė kašubu kultūrėnio sosėvienijėmo, Žemaitiu kultūras draugėjės informacėnio cėntro Vilniou ėr Šv. Maksimiljuona M. Kolbės jaunima sosėtaikīma ėr sosėtėkėmu nomās igīvendėna 24 kultūrėnės pruogramas, katruos dalīvava jaunė žmuonės iš vėsuos Lietuvuos, daugiausē – iš Žemaitėjės. 
Korporacėjės narē aktīvē prisided pri žemaitėškas spauduos leidības, īr spaudā parėngė nemažā straipsniu Žemaitėjės istuorėjės ėr kultūras klausėmās.
1999-2002-ās metās korporacėjė leida laikrašti „Samogitia“.
2000 m. lapkrėstė mienesi gražē bova pažīmieta korporacėjės „Virvītės” ansamblė pėnkiū metu sokaktės.
Nu 2001 m. gegužies mienesė leida elektruonėni skaitmenėni leidėni „SAMOGITIA“.
2002 m. karto so Žemaitiu kultūras draugėjės inpormacėnio kultūras cėntro korporacėjė organizava suoceluogėni tīrėma diel žemaitiu kalbuos vartuojėma Žemaitėjės muokīkluos ė žemaitiu šeimuos. Tīrėma rezulltatus sosistemėnus, Skoudė ėr Varniūs organizava Žemaitėjės muokītuoju konfėrėncėjė diel Žemaitiu krašta etnėnės kultūras ėr žemaitiu kalbuos integravėma i Žemaitėjės bėndruojė lavėnėma muokīklu muokīma pruogramas.
2005 m. išleida žemaitiu modernizouta folkluora CD „A MON SAKĀ?“ (dainiou folkluora ansamblis „VIRVĪTĖ“).
2009 m. išleida naujė kompaktėnė pluokštelė „Aš budavuosio marga dvareli“.
2010 m. pradiuo bova turiningā pamėnavuota AŽJK „Samogitia“ folkluora ansamblė 15 metu sokaktės.
2011–2022 m. korporacėje igyvendėna daug kultūras ėr švėitėma pruojektu, plietuojė folkluora ansamblė „Virvītė“ veikla, aktīvē dalīvava Vėlniaus miesta ėr Žemaitėjės kultūrėnemė gīvenėmė.
Tuokė pat veikla korporacėjė vīkda ėr 2023-ās metās.
Daigiau aple folkluora kolektīva „Virvītė“ (teksts lietovėškā) >
RKIC inpormacėjė
Portėgrapėjuos – folkluora ansamblis „Virvytė“
Portėgrapėjės iš folkluora ansamblė „Virvytė“ arkīva