Pirmininkė – Loreta Sungailienė.
Korporacijos identifikacinis numeris (kodas) – 191935890.
Adresas: Poškos g. 7-3, LT-08123 Vilnius
Puslapis Facebook portale – https://www.facebook.com/VIRVYTE/
Žemaitiu akademėnė jaunima korporacėjė „Samogitia“ Lietuvuos Respublikas Teisingoma ministerėjuo iregistrouta 1996 m. groudė 24d.
Daugiau aple korporacėjė
Tėms, katrėi iduomaujės žemaitiu stodėntu kultūrėniu sājūdiu istuorėjė, īr žėnuoma tarpukarė metās Lietuvuos aukštuosies muokīkluos veikusiu žemaitėšku korporacėju, katruos tonkē toriejė „Samogitia“ pavadėnėma, reikšmie bėndramė žemaitiu kultūrėnemė judiejėmė.
Žemaitiu akademėnė jaunima korporacėjės „Samogitia” isteigėms pėrms bandīms atkortė tū bovusiu korporacėju veikla, besimuokonti Žemaitėjės jaunima itrauktė i žemaitiu kultūrėni ėr muokslėni jodiejėma.
„Samogitia“ cėntros glaudas pri Žemaitiu kultūras draugėjės redakcėjės.
Korporacėjės branduoli sodara ivairiuos Vilniaus aukštuosies muokīkluos besimuokou ėr nesenē muokslus bėngės jaunīms.
Korporacėjė tor sava žemaitiu fuolkluora grupė „Virvītė“. Ansamblis nemažā koncertoun, dalīvaun Žemaitiu kultūras draugėjės ėr Žemaitiu akademėjės rėnginiūs.
1997 m. vasara korporacėjė organizava kompleksėnė ekspedicėjė Muosiedie (Skouda rajuons), dalīvava tarptautėnemė baidarininku sāskrīdie Gdanskė.
Korporacėjės narē aktīvē prisided pri žemaitėškas spauduos leidības, īr spaudā parėngė nemažā straipsniu Žemaitėjės istuorėjės ėr kultūras klausėmās.
Korporacėjė „Samogitia“ nepuolitėnė organizacėjė, katruo gal dalīvautė ivairiū tautībiu, religėju ėr pažiūrū žmuonės nu 16 metu omžiaus.
Svarbiausis korporacėjės tėkslos vienītė Žemaitėjės akademini jaunima ėr kėtus žmuonis, katrėi rūpėnas jaunima švėitėmo ėr ugdīmo, sudarītė geresnės sālīgas muokītėis ėr bėndrautė Žemaitėjės krašta istuorėnio ėr kultūrėnio paveldo besėiduomaujėntėms ėr tou pavelda saugontėms, aple anou informacėjė skleidontėms jaunėms žmuonėms, nukreiptė akademini ėr kėta jaunima studėjoutė Žemaitėjės praeiti ėr dabarti, užsienė šaliū etnuografiniu regiuonu kultūrėnė judiejėma tradicėjės ėr pasiekėmus, skleistė anū patirti Lietuvuo, dalīvautė tarptautėnėmė jaunima kultūrėnėmė ėr akademėnemė judiejėmė, ugdītė būsėmūsius Žemaitiu krašta tīrėnietuojus ėr muokslėninkus, vėsuomenės veikiejus, stėprintė nepriklausuoma ėr vėininga Lietuvuos valstībė.
1999–2002 metās karto so Lėnkėjės Respublikas Pamarė kašubu kultūrėnio sosėvienijėmo, Žemaitiu kultūras informacėnio cėntro Vilniou ėr Šv. Maksimiljuona M. Kolbės jaunima sosėtaikīma ėr sosėtėkėmu nomās igīvendėna 24 kultūrėnės pruogramas, katruos dalīvava jaunė žmuonės iš vėsuos Lietuvuos, daugiausē – iš Žemaitėjės.
1999-2002-ās metās korporacėjė leida laikrašti „Samogitia“.
2000 m. lapkrėstė mienesi bova pažīmieta korporacėjės „Virvītės” ansamblė pėnkiū metu sokaktės.
Nu 2001 m. gegužies mienesė leid elektruonėni skaitmenėni leidėni „SAMOGITIA“.
2002 m. karto so Žemaitiu kultūras draugėjės informacėjės cėntro korporacėjė Skoudė ėr Varniūs organizava Žemaitėjės muokītuoju konfėrėncėjė diel Žemaitiu krašta etnėnės kultūras ėr žemaitiu kalbuos integravėma i Žemaitėjės bėndruojė lavėnėma muokīklu muokīma pruogramas.
2005 m. išleida žemaitiu modernizouta folkluora CD „A MON SAKĀ?“ (dainiou folkluora ansamblis „VIRVĪTĖ“.
2009 m. išleida naujė kompaktėnė pluokštelė „Aš budavuosio marga dvareli“.
2010 m. pradiuo pamėnavuota AŽJK „Samogitia“ folkluora ansamblė 15 metu sokaktės.
2011–2019 m. korporacėje īgyvendėna kultūras ėr švėitėma pruojektus, plietuo folkluora ansamblė „Virvītė“ veikla, aktīvē dalīvava Vilniaus miesta ėr Žemaitėjės kultūrėnemė gīvenėmė.
Tuokė pat veikla korporacėjė planou vīkdītė ėr 2020-āsēs metās.
RKIC inpormacėjė
Portėgrapėjuos – folkluora ansamblis „Virvytė“
Portėgrapėjės iš folkluora ansamblė „Virvytė“ arkīva