2022 m. gegužės 21 d. Telšiūs, če veikontiuos Telšiū konėgū semėnarėjės patalpuos, ivīka Žemaitiu kultūras draugėjės (ŽKD) IX sovažiavėms. Anuo dalīvius pasveikėna Lietovuos Respublikas Seima parlamėntėnės žemaitiu gropės pėrmininkė Šalaševičiūtė Rimantė, Telšiū rajuona mers Gusaruovs Kēstotis, kėtė garbingė sovažiavėma svetē.
Sovažiavėmė sava darba ataskaita perskaitė draugėjės pirmininks Kasperavičios Stasīs, pranešėma „Istuorėnė Euruopos žemė – Žemaitėjė. Kėik svarbi Lietovā savastės?“ – pruofesuorios Žebrauskis Algėrds, ontrouji pranešėma („Žemaitiu kalba: keravuojėms ėr iteisėnėms“) – pruofesuorios Pabrieža Jūzaps.
Sovažiavėmė išrinkts naus draugėjės prezidiums – narē: Balsīs Rimants (Klaipieda), Jocīs Virginijus (Vėlnios), Kasparavičiūtė Raimonda (Telšē), Kaubrīs Egidijus (Telšē), Pabrieža Juozaps (Šiaulē), Šedvėls Lins (Varnē), Zabitienė Dalė (Skouds), Žalpīs Edmunds (Vėlnios), Žebrauskis Algėrds (Telšē).
Sovažiavėmė bova aptartė ŽKD naujū īstatu parėngėma klausėmā, svarstīta tuolėmesnės veikluos pruograma. Rėngėnie Lietovuos Respublikas ministrės pirmininkės padiekuos raštās apduovėnuotė žemaitiu kultūrā nosėpelnė žmuonės.
Tou patė dėina ivīka ęr pėrmāsis naujē išrinkta prezidiuma puosiedis, katrame draugėjės pirmininko išrinkts Žebrauskis Algėrds, anuo pavaduotuojēs – Pabrieža Jūzaps ėr Kasparavičiūtė Ramonda.
Žemaitiu kultūras draugėjės veikluos pruogramas pagrindėne matmėnīs:
- Bėndradarbiaujint so Lietovuos Respublikas Seima parlamėntėnė žemaitiu gropė ėr Žemaitėjės rajuonu savėvaldībiem igīvendintė Žemaitiu kultūras draugėjės, Žemaitiu kongresa (Telšē–Šiauliū rajuons, 2020 m.) rezuoliucėjė „Diel žemaitiu kalbuos, istuorėnė Žemaitėjės regėjuona iteisėnėma, ėšsauguojėma ėr integracėjės“.
- Bėndradarbiaujint so Lietovuos Respublikas Seima parlamėntėnė žemaitiu gropė iteisintė Telšius kap Žemaitėjės istuorėnė-etnuograpėnė regėjuona suostėnė.
- Parėngtė naujus Žemaitiu kultūras draugėjės īstatus ėr anus iregėstroutė istaīmu nustatīto tvarko.
- Kreiptėis i Telšiū rajuona savėvaldībė diel ŽKD ir ŽKD Telšiū skīriaus veiklā reikalingu patalpū panauduos pagrindās soteikėma.
- Organizoutė Žemaitėjės istuorėnė-etnonuograpėnė regėjuona heraldėkas (herbu, vielevu, ontspaudu) atnaujėnėma, atsižvelgont i naujus Lietovuos heraldėkas kuomisėjės reikalavėmus, bet nekeitont Lietovuos heraldėkas kuomisėjės patvirtintu Žemaitėjės dėdžiuojė ėr mažuojė herbu, vielevu, heraldėniu simbuoliu (meška – istuorėnė, so ontkaklio, istuorėnės žemės statusos – konėgaikštė keporė, istuorėnė Euruopa žemės – luotīnėšks šūkis „PATRIA UNA“, ipatings indielis Lietovuos istuorėjē ėr valstībigomou – laikītuojē: ginība – kalavijos, pajūris – inkars).
- Organizoutė Žemaitėjės istuorėjės vaduovelė muokīkluoms parėngėma ėr ėšleidėma.
- Skatintė muokuomuosės medžegas, metuodėniu priemuoniu, skėrtū žemaitiu kalbuos ėr rašības muokīmou švėitėma īstaiguos (darželiūs ėr muokīkluos), leidėma.
- Pakartuotėnā ėšleistė dailininka A. Každailė spaudā parėngta istuorėni Žemaitėjės žemielapi.
- Bendradarbiaujint so Žemaitėjės rajuonu savėvaldībiem skatintė Žemaitėjės simbuoliu (vielevas, herba, žemielapė) nauduojėma viešuos erdvies ėr rėngėniūs, organizoutė istuorėniu, kalbėniu, etnuograpėniu konferėncėju medžegas leidība, inicijoutė mena žėnklū, katrėi iprasmėn Žemaitėjės istuorėjė, žīmius Žemaitėjės žmuonis, kūrėma, puoselietė, sauguotė, ėr puopolerintė krašta etnėnė kultūra.
- Skatintė mena kūrėniūs Žemaitėjės vėitu pavadėnėmus atvaizdoutė žemaitiu kalbo.
- Sokortė žemaitiu, katrėi gīven Žemaitėjuo ėr kėtūs Lietovuos regėjuonūs ėr tor „Žemaitė pasa“ (īr žemaitiu kultūras draugėjės narē), bėndra registra.
- Vėsor, kor īr žemaitiu, lėipas 13 dėina mėnavuotė kap ŽEMAITIU VĖINĪBĖS DĖINA.
- Žebrauskė Algėrda straipsnis „Žemaitija (lot. Samogitia) – istorinė Europos žemė“
- Žebrauskė Algėrda pranešėma, perskaitīta Žemaitiu kultūras draugėjės IX sovažiavėmė, fragmėnts https://www.youtube.com/watch?v=-6NeHP9AZE8
- Pabriežas Jūzapa pranešėma, perskaitīta Žemaitiu kultūras draugėjės IX sovažiavėmė, fragmėnts https://www.youtube.com/watch?v=1ShYQSCBtdk
Teksts parėngts pagal Žemaitiu kultūras draugėjės inpormacėjė
Inpormacėjė paskelbta igīvendėnont 2022 m. Spauduos, radėjė ėr televizėjės riemėma fonda remama pruojekta „Elektruonėnis žornals „Žemaitiu žemė“
