A. Zulumskītė – pedaguogė, muokslėninkė, poetė, kultūras darbuotuojė. Ana gėmė 1970 m. kovo 29 d. Kretinguo. 1977–1988 m. muokies Kretinguos ontruojie vėdorėnie muokīkluo, 1988–1992 m. – Šiauliū pedaguogėnemė institutė, tėn isėgėjė pradėniu klasiu muokītuojės kvalifikacėjė. Vieliau, 1996–2000 m., edukuoluogėjės žėnės gėlėna studijoudama Klaipiedos universiteta doktorantūruo. Anuos disertacėjės tema bova „Vāka pasaulievaizdė plietra Lietovos pradėnie muokīkluo 1918–1998 m. pruogramu aspekts“. Baigos doktorantūras studėjės, anā bova soteikts socialėniu muokslu (edukuoluogėjės) daktara laipsnis, 2005 m. Klaipiedas universitetė – pedaguogėnis duocėntės vards.
A. Zalumskītė Klaipiedas universitetė dėrb lig šiuol, papėlduomā – dar ėr Kretinguos rajuona kultūras cėntra rėngėniū organizatuorė ėr režisierė. Puoseliedama žemaitiu kalba, tonkē , scenarėjus raša ėr rengėnius ved žemaitėškā.
KODAK Digital Still Camera
1992–1998 m. vadovaujint režisierioui Radžiou Egidėjou bova Kretinguos kultūras rūmu liaudės tētra (dabar – Egidėjaus Radžiaus tētros), artistė.
1992–1996 m. dėrba pradiniu klasiu muokītuojė Kretinguos katalėkėškuo vėdorėnie muokīkluo (dabar Prancėškuonu gėmnazėjė), 1998– 2000 m. bova tuos gėmnazėjės dėrektoriaus pavaduotuojė ugdīmou, 2000–2001 m. – Klaipiedas universiteta Muoksla skīriaus doktorantūras rēkalū vīr. inspektuorė, 1996–2001 m. – tuo patėis universiteta Ugdīma metuodiku katedras ėr Edukuoluogėjės katedras asistėntė. 2000–2005 m. dėrba Vītauta Dėdiuojė universiteta Katalėku teuoluogėjės fakulteta Kretinguos Šv. Antana religėju studėju instituta lektuorė, Lietuvuos versla kuolegėjuo, Telšiū konėgū semėnarėjuo, 2001–2003 m. – Klaipiedas universiteta Edukuoluogėjės katedras lektuorė, nu 2003 m. ana īr tuos katedras duocėntė.
Par muokslėnė darba metus īr parašiosi daugiau kap 60 muokslėniu straipsniu, išleidosi tris metuodėnės kningas, īr trėjū tarptautėniu muokslėniu monografėju bėndraautuorė.
Ana īr ėr trijū eilieraštiu rinkėniū: „Didelis vilties pasaulis“ (1995 m.), „Ilgesio vėjas“ (1998 m.), „Laiko lelijos“ autuorė. A. Zulumskītės kūrėniū īr atspausdinta almanakūs „Poezijos pavasaris 1999“, „Baltija 2002“, kninguos „Lietaus dvasia“ (2001 m.), „Kretingos krašto žodžio meistrai“ (2004 m.), daugelie perėjuodėniu leidėniū – „Literatūra ir menas“, „Gairės“, „Pajūrio naujienos“, „Švyturys“, „Šeimininkė“, „Inžinerija“ ėr kt.
Kalbiedama aple žemaitėška literatūra, ana saka, ka žemaitiu kalbo gal ne tik anekduotus „skaldītė“ ar balabeikas rašītė. Tad pati renkas tū autuoriu, katrėi aple rimtus rēkalus raša ne prastiau, nego bėndrėnė lietoviu kalbo, sogeb sava darbūs atskleistė subtilius jausmus, gėlės mintis, kūrėnius.
Aušrėnė jau šmuots metu siekmingā bėndradarbiau so ivairēs kompozituorēs kordama dainū tekstus vākū, ansambliu, chuoru, liaudėšku kapelu dainuoms. Tekstu jau īr parašīta bemaž 100, skomb anėi Kretinguos koncertūs, „Dainū dainelės“ konkursūs, respoblėkėnies Dainū švėnties, televizėjės laiduos…
- Zalumskītė kāp geriausė 1999 m. Kretinguos rajuono literatė īr apduovėnuota Bruonės ėr Juona Liniauskū premėjė. Tās patēs metās anā bova soteikts Lietovuos muokītuoju literatu draugėjės „Spindulys“ organizouta „Vieno kūrinio konkurso“ laureatės vards.
Eilieraštius ėr pruozas kūrėnius raša bėndrėnė lietoviu ėr žemaitiu kalbuom. Tarp žemaitėšku eilieraštiu – daug tradicėnė liaudėška stiliaus, jumoristėniu kūrėniū.
Nauduota literatūra:
Birutė Paulauskaitė, „Aušrinė Zulumskytė“, Kretingos rajono savivaldybės Motiejaus Valančiaus viešoji biblioteka / Personalijos: https://www.kretvb.lt/personalijos/zulumskyte-ausrine/ (žr. 2022-04-15).
Parengė Mukienė Danutė
Portėgrapėjuo – Zulumskītė Aušrinė
Teksts parengts igīvendėnont 2022 m. Spauduos, radėjė ėr televizėjės riemėma fonda remama pruojekta „Elektruoninis žornals „Žemaitiu žemė“
