2023 m. tretioujė šv. Velīku dėina (balondė 11) pagal jau daug metu Vėlniou gīvoujėntė tradicėjė šv. Mėšės vīka žemaitėškā. Anas Žvierīna Švč. Mergelės Marijės Nekaltuojė Prasėdiejėma bažnīčiuo aukuojė Vėlniaus žemaitiu kultūras draugėjės narīs – ėš Plungės krašta kėlės klėbuons Rapalis Vītauts. Šv. Mėšiū Lėtorgėjuo gėiduojė ėr pu šv. Mėšiū bažnīčiuo koncertava Kretinguos kultūras cėntra mėšrus ansamblis „Svaja“ ėr vuokalinis duets (dainininkā Duomarkātė-Budrienė Nomeda ėr Žilīs Aloīzos). Skomviejė A. Žilė sokortas dainas ėr gėismie pagal ivairiū autuoriu tekstus.
Šv. Mėšiuos dalīvava, sosėrinkusius su šv. Velīkuom pasveikėna šv. Mėšiū Vėlniou ėlgametė organizatuorė, bovusi Vėlniaus žemaitiu kultūras draugėjės pirmininkė Dirgielienė Dalė ėr Lietovuos Respublikas Seima narē Šalaševičiūtė Rimantė ėr Vinkos Antans.
Vėngalė Bonipaca portėgrapėjuos:
* Vėršou dešėnie – Kretinguos kultūras cėntra mėšrus ansamblis „Svaja“ , ansamblė vaduovs A. Žilios, Vėlniaus Žvierīna bažnīčės klėbuons V. Rapalis ėr kėtė šv. Mėšiū organizatuorē;
* Kairie – bėndra šv. Mėšiuos dalīvavusiu žemaitiu ėr ansamblė „Svaja“ portėgrapėjė
RKIC inpormacėjė